Монгол Улсын Шадар сайд, Онцгой комиссийн дарга, Өвөлжилтийн бэлтгэл хангуулах, биелэлтийг зохион байгуулах Онцгой комиссийн дарга Ц.Оюунбаатар болон холбогдох албаны хүмүүстэй Засгийн газрын цахим хурал хийлээ. Цахим хуралд аймгийн ЗДТГ-ын дарга Б.Түвшинбаяр, ТЗУХ-ийн дарга Ш.Бат-Эрдэнэ, ХБХ-ийн дарга Т.Дөлбаяр, Онцгой байдлын газрын дарга Л.Баярсайхан, ХХААГазрын дарга Л.Цэцэг-Өлзий зэрэг албаны хүмүүс оролцлоо.
Тус хурлаар мал сүргийг цаг агаарын аюулт болон гамшигт үзэгдэл, хэт хүйтний нөлөөллөөс хамгаалах, малын хашаа байрны хүрэлцээ хангамжийг нэмэгдүүлэх, сайжруулах талаар үлдэж байгаа сар хүрэхгүй хугацаанд эрчимтэй ажиллахыг чиглэл болголоо. Өвс хадлан бэлтгэх ажил удаашралтай байна. Гар тэжээл бэлтгэх, өвөл хавар ашиглах бэлчээрээ нөөцлөн хамгаалах талаар малчид онцгой анхаарах хэрэгтэй. Энэ талаар төв, орон нутгийн хэвлэл, мэдээллийн байгууллагууд малчдад хандсан нэвтрүүлэг, сурталчилгааг идэвхжүүлэхийг уриаллаа.
Малын тарга хүчинд муугаар нөлөөлдөг, арьс, ноос, үсийг гэмтээж хүйтнийг тэсвэрлэх чадваргүй болгодог гадаргуугийн шимэгчдээс малыг хамгаалах, халдварын голомтыг устгах ажлыг энэ намрын нэг чухал кампанит ажил болгон зохион байгуулахыг үүрэг болголоо.